Cecilie Holen er tilsett som seniorrådgjevar kvalitet og beredskap. Ho starta delvis på beredskapsdelen av jobben allereie i september. Holen tok over jobben som beredskapskoordinator etter Henrik Wang som gjekk av med pensjon før jul.
Holen har også vore med i beredskapsgruppa sidan midten av mars. Ho har vore tilsett som pedagogisk rådgjevar barnehage i Giske kommune sidan september 2018.
«Eg har trivst veldig godt i oppvekstsektoren i Giske kommune, og kjem til å sakne det nære samarbeidet med barnehagane, skulane, spesialpedagogane og PPT. Samtidig set eg stor pris på tilliten eg har blitt vist med å få tilbod om denne nye jobben, der eg mellom anna skal jobbe med kvalitet i alle sektorane i kommunen. Eg har mykje å setje meg inn, men gler meg til nye utfordringar og å bli kjent med nye samarbeidspartnarar», seier Holen.
Hilde Røsvik er tilsett som stabsleiar for kultur, service og næring. Dette er ei nyoppretta stilling. Røsvik har budd i Giske kommune sidan 1993, men har dei siste fire og eit halvt åra budd på Svalbard. Ho har tidlegare vore redaktør i Øy-Blikk i 12 år og kjenner kommunen godt frå dette arbeidet.
«Eg har fått mange spennande oppgåver, og gler meg til å ta ordentleg fatt. Så langt har eg brukt tid på å sette meg inn i saker og bli betre kjend med dei eg skal jobbe saman med. Eg kjenner mange ansikt frå før, det er ei god kjensle», seier Røsvik.
Åse Elisabeth Skjærseth gjekk frå rektorstilling ved Vigra skule til kommunalsjef for oppvekst. Skjærseth har vore rektor på Vigra sidan 2014. Ho tok over etter Arnfinn Vartdal, som har vore konstituert kommunalsjef sidan 2019.
«Eg gler meg til å leie oppvekstsektoren. Kvar dag må vi spørje oss kva barnets beste i barnehage og skule kan vere. Vi vil samle oppvekst i felles retning og lære av kvarandre. Eg håper vi kan få til å framsnakke oppvekst saman: ungane er dyrebare, foreldra engasjerte og dei tilsette brenn for å utvikle best mogleg tenester innafor dei rammene vi har. Eg er stolt over tilliten og audmjuk i møte med ansvar og oppgåver», seier Skjærseth.